काठमाण्डौ – अख्तियार दुरुपयोग अनुसन्धान आयोगले भूमि आयोग कास्कीका तत्कालीन अध्यक्ष गङ्गाप्रसाद पोखरेलसहित ६ जनाविरुद्ध भ्रष्टाचार मुद्दा दायर गरेको छ ।

नक्कली सुकुम्वासीलाई विद्यालयको जग्गा दिएको आरोपमा आयोगले पोखरेलसहित मालपोत कार्यालय कास्कीका तत्कालीन प्रमुख रामचन्द्र अधिकारी, भूमि आयोग कास्कीका तत्कालीन सदस्य आशाबहादुर गुरुङ, उमाकुमारी थापा, सोमबहादुर नेपाली र गैरकानूनी लाभ लिएको अभियोगमा भीमबहादुर विकविरुद्ध आज विशेष अदालतमा मुद्दा दायर गरेको हो ।

आयोगले ६ जनासँग जनही १ करोड ४० लाख २५ हजार रुपैयाँका दरले बिगो कायम गरेको छ ।

मालपोत कार्यालय कास्कीका प्रमुख मालपोत अधिकृत रामचन्द्र अधिकारी लिचीबारी जग्गा प्रकरणमा समेत मुछिएका व्यक्ति हुन् । त्यति बेला उनीहरूबीचको संवादमा भूमी व्यवस्थामन्त्री बलराम अधिकारीले अर्कैसँग घुस खाइ कास्कीको भूमि आयोग अध्यक्ष नियुक्ति गरिसकेको कुराकानी बाहिरिएको थियो । त्यही कुराकानीमा प्रसङ्ग निस्किएको भूमि आयोग कास्कीका तत्कालीन अध्यक्ष गङ्गाप्रसाद पोखरेलसहित सबै पदाधिकारी भ्रष्टाचार मुद्दामा परेका हुन् ।

पोखरा महानगरपालिका वडा नम्बर २६ लेखनाथमा रहेको सामुदायिक अमरज्योति आधारभूत विद्यालयको ३ रोपनी ३ आना जग्गा भूमि आयोगले नक्कली सुकुम्वासीका नाममा दर्ता गरेको अख्तियारको आरोप छ ।